وين بصنّف هاد الحساب؟
اكتب اسم أي حساب من قائمة الدخل، وبتعرف فئته حسب معيار IFRS 18 مع سبب التصنيف. بنبدأ بسؤالين عن نشاط المنشأة، لأنهم بيغيروا تصنيف بنود كتير.
عرّفنا على المنشأة
هل النشاط الرئيسي للمنشأة هو الاستثمار في أصول؟
مثل شركات الاستثمار العقاري، وصناديق الاستثمار، والشركات اللي دخلها الأساسي من عوائد الاستثمارات.
هل النشاط الرئيسي للمنشأة هو تقديم التمويل للعملاء؟
مثل البنوك، وشركات التمويل والتأجير التمويلي، أو شركة تجارية تقدم تمويلاً لعملائها كنشاط رئيسي.
السياسة المحاسبية لتكاليف التمويل غير المرتبطة بتمويل العملاء
المعيار بيعطي المنشآت المموِّلة خياراً: إما تصنيف كل دخل ومصروف الالتزامات التمويلية في الفئة التشغيلية، أو التشغيلية فقط للمرتبط بتمويل العملاء والباقي تمويلية.
شو رح يتغير بقائمة الدخل؟
نفس الأرقام لنفس الشركة، مرة بالشكل الشائع تحت IAS 1 ومرة حسب IFRS 18. اضغط على أي بند لتشوف وين راح وليش. وجرّب تغيّر نوع الشركة لتشوف كيف نفس البنود بتتحرك.
IAS 1
العرض الشائع بالممارسة
IFRS 18
مصنفة حسب الفئات مع المجاميع الإلزامية
اختار بند
اضغط على أي سطر بأي قائمة. والبنود المعلّمة بـ"انتقل" هي اللي تغير مكانها بالنسبة للربح التشغيلي.
للتوسع: الدرس 3: قائمة الدخل، والدرس 10: الحالات الخاصة على قناة EDGE JO
الأرقام توضيحية. ضريبة الدخل مفترضة 20% من الربح قبل الضريبة.
قبل وبعد حسب القطاع
اختار نوع المنشأة وشوف قائمة دخلها بالشكل الشائع تحت IAS 1 وحسب IFRS 18. اضغط على أي بند لتعرف وين راح وليش.
IAS 1
العرض الشائع بالممارسة
IFRS 18
مصنفة حسب الفئات مع المجاميع الإلزامية
اختار بند
البنود المعلّمة بـ"انتقل" هي اللي تغير موقعها بالنسبة للربح التشغيلي.
الأرقام توضيحية بالآلاف. ضريبة الدخل مفترضة 20% من الربح قبل الضريبة بكل الأمثلة، والنسب الفعلية بتختلف حسب القطاع والبلد.
العرض حسب الوظيفة والإيضاح المطلوب
إذا عرضت المنشأة مصروفاتها التشغيلية حسب الوظيفة (تكلفة الإيرادات، والبيع، والإدارية)، بيطلب IFRS 18 إيضاحاً واحداً بيبين مجموع بعض المصروفات حسب طبيعتها، وكم منها داخل بكل بند من بنود القائمة.
الإيضاح: مصروفات تشغيلية محددة حسب طبيعتها
المبلغ المضمّن في كل بند من بنود قائمة الأرباح والخسائر
الإيضاح بيغطي خمس طبائع: الاستهلاك، والإطفاء، ومنافع الموظفين، وخسائر انخفاض القيمة ضمن نطاق IAS 36 (وعكسها)، وتخفيض المخزون (وعكسه). والفكرة إنه المستخدم يقدر يعرف مثلاً كم كلفة الموظفين الكلية للشركة، حتى لو كانت موزعة على تكلفة الإيرادات والبيع والإدارية.
والمعيار بيطلب من المنشأة تختار طريقة العرض اللي بتعطي أفضل ملخص مفيد لمصروفاتها، ومسموح تخلط بين الطريقتين إذا كان هاد أنفع. وبس تختار العرض حسب الوظيفة، الإيضاح بيصير إلزامي.
للتوسع: الدرس 5: عرض المصروفات على قناة EDGE JO
الأرقام توضيحية ومبنية على نفس مثال الشركة التجارية بتبويب المقارنة.
مقاييس الأداء المحددة من الإدارة
كتير شركات بتحكي بعروض المستثمرين عن "الربح التشغيلي المعدّل" أو "الربح الأساسي". IFRS 18 ما منعها، بس صار يطلب إنه أي مقياس من هالنوع يدخل جوا القوائم المالية بإيضاح خاص، مع تسوية واضحة لأرقام المعيار.
هل المقياس عندك MPM؟
جاوب على الأسئلة الأربعة وبتعرف إذا لازم تفصح عنه.
هل المقياس مجموع فرعي للإيرادات والمصروفات؟
"الربح التشغيلي المعدّل" نعم. أما "التدفق النقدي الحر" أو "عدد العملاء" أو "صافي الدين" فلا، لأنها مش إيرادات ومصروفات.
هل تستخدمه المنشأة في اتصالات عامة خارج القوائم المالية؟
مثل عروض المستثمرين، وتقرير مجلس الإدارة، والبيانات الصحفية عن النتائج.
هل يعبّر عن وجهة نظر الإدارة لجانب من الأداء المالي للمنشأة ككل؟
المعيار بيفترض إنه الجواب "نعم" لأي مجموع بتستخدمه الشركة علناً، إلا إذا قدرت تثبت عكس هيك بأدلة معقولة.
هل هو من المجاميع اللي المعيار نفسه بيحددها أو بتطلبها معايير أخرى؟
مثل مجمل الربح، والربح التشغيلي، والربح التشغيلي قبل الاستهلاك والإطفاء وانخفاض القيمة، والربح قبل ضرائب الدخل. هدول مش MPMs حتى لو استخدمتهم الإدارة.
جاوب على الأسئلة
النتيجة بتطلع هون.
مثال: "الربح التشغيلي المعدّل"
نفس الشركة التجارية بتبويب المقارنة. الإدارة بتعرض بتقريرها للمستثمرين "الربح التشغيلي المعدّل"، اللي بيستبعد البنود اللي بتعتبرها غير متكررة.
| التسوية | المبلغ | أثر ضريبة الدخل | أثر الحصص غير المسيطرة |
|---|---|---|---|
| الربح التشغيلي (المجموع الأقرب في IFRS 18) | 2,110 | – | – |
| يضاف: انخفاض قيمة الشهرة | 150 | 0 | 0 |
| يطرح: ربح بيع معدات | (60) | (12) | 0 |
| الربح التشغيلي المعدّل (MPM) | 2,200 |
ليش أثر الضريبة صفر بالشهرة؟ لأنه انخفاض قيمة الشهرة غالباً مش قابل للخصم ضريبياً، فاستبعاده ما بيغير الضريبة. أما ربح بيع المعدات فكان خاضع للضريبة بنسبة 20%، فأثره 12. والمعيار بيطلب تبين كمان كيف حسبت أثر الضريبة.
شو لازم يتضمن الإيضاح؟ كل مقاييس الإدارة بتنعرض بإيضاح واحد، وفيه: وصف المقياس وليش الإدارة شايفته مفيد، وكيف بينحسب، وتسوية للمجموع الأقرب إله من مجاميع IFRS 18، وأثر الضريبة والحصص غير المسيطرة لكل بند تسوية، وإذا غيرت الإدارة طريقة الحساب أو بطلت تستخدم المقياس، لازم تشرح التغيير وسببه.
وشو ما بيصير MPM؟ النسب لحالها (متل هامش الربح المعدّل) مش MPM، بس إذا البسط فيها مجموع فرعي معدّل، فالبسط نفسه بيكون MPM. والمقاييس اللي مش إيرادات ومصروفات متل التدفق النقدي الحر برا نطاق المتطلب.
للتوسع: الدرس 7: الإيضاحات، والدرس 8: المصطلحات والإرشادات على قناة EDGE JO
الأرقام توضيحية، وافترضنا ما في حصص غير مسيطرة.
شو تغير بقائمة التدفقات النقدية؟
مع إصدار IFRS 18 انعدل معيار IAS 7 بنقطتين أساسيتين: نقطة بداية الطريقة غير المباشرة صارت الربح التشغيلي، وانلغت حرية الاختيار بتصنيف الفوائد والتوزيعات لأغلب الشركات.
1. نقطة البداية بالطريقة غير المباشرة
قبل
البداية من الربح أو الخسارة (غالباً الربح قبل الضريبة)
بعد
البداية إلزامياً من الربح التشغيلي
وين حصة أرباح الشركة الزميلة؟ بالحالتين ما دخلت التدفقات التشغيلية. بالطريقة القديمة البداية كانت من الربح قبل الضريبة، وهو بيشمل الحصة (120)، فكان لازم نطرحها لأنها ربح محاسبي مش نقد. وبالطريقة الجديدة الحصة أصلاً برا الربح التشغيلي، لأنها بالفئة الاستثمارية بقائمة الأرباح والخسائر، فما بتحتاج طرح. واللي بيظهر بالتدفقات هو النقد الفعلي المقبوض من الزميلة كتوزيعات، وبيروح للأنشطة الاستثمارية:
افترضنا إنه الزميلة وزعت 70 نقداً من حصة أرباح المنشأة البالغة 120، وإنه باقي الفوائد والتوزيعات انقبضت واندفعت نقداً بنفس مبالغها.
النتيجة نفسها، بس التسوية صارت أقصر وأوضح. السبب إنه بنود الفوائد والتوزيعات وحصة الزميلة أصلاً برا الربح التشغيلي، لأنها بالفئات الاستثمارية والتمويلية بقائمة الأرباح والخسائر، فما في داعي تضيفها وتطرحها. وصار في ربط مباشر بين الرقم اللي بتشوفه بقائمة الدخل والرقم اللي بتبدأ فيه التدفقات.
2. تصنيف الفوائد والتوزيعات
| البند | قبل | بعد: منشأة عادية | بعد: منشأة نشاطها الرئيسي التمويل أو الاستثمار |
|---|---|---|---|
| الفوائد المدفوعة | تشغيلية أو تمويلية (خيار) | تمويلية | حسب تصنيف مصروف الفائدة بقائمة الأرباح والخسائر |
| الفوائد المقبوضة | تشغيلية أو استثمارية (خيار) | استثمارية | حسب تصنيف إيراد الفائدة بقائمة الأرباح والخسائر |
| التوزيعات المقبوضة | تشغيلية أو استثمارية (خيار) | استثمارية | حسب تصنيف إيراد التوزيعات بقائمة الأرباح والخسائر |
| التوزيعات المدفوعة | تشغيلية أو تمويلية (خيار) | تمويلية | تمويلية |
ليش هالتغيير مهم؟ قبل، شركتين بنفس الوضع ممكن تطلعلهم تدفقات تشغيلية مختلفة كتير، بس لأنه وحدة حطت الفوائد المدفوعة بالتشغيلية والتانية بالتمويلية. هلأ لأغلب الشركات التصنيف موحد، فصارت المقارنة أسهل.
والمنشآت ذات النشاط الرئيسي المحدد (متل البنوك وشركات التمويل والاستثمار) بتصنف كل نوع من هالتدفقات بفئة وحدة، بالرجوع لتصنيف الإيراد أو المصروف المرتبط فيه بقائمة الأرباح والخسائر. فبنك فوائده تشغيلية بقائمة الدخل، بيصنف الفوائد المقبوضة والمدفوعة كتدفقات تشغيلية.
قبل ما تطبق: راجع السياسة المحاسبية الحالية لشركتك. إذا كنت حاطط الفوائد المدفوعة بالتشغيلية، رح يرتفع صافي التدفق التشغيلي بعد التطبيق، وهاد لازم يكون واضح للإدارة والبنوك قبل ما يتفاجؤوا فيه.
الأرقام توضيحية ومثال مستقل عن تبويب المقارنة.